Притисоците и заканите врз средношколците, нивните родители, но и наставниците кои не се согласуваат и им се спротивставуваат на владините образовни политики во државава, претставуваат директно загрозување на слободата на изразување и слободата на здружување, реагираат од НВО Инфоцентар.
„Граѓаните во Република Македонија, и според Уставот и според сите меѓународни документи кои ги има ратификувано државата, имаат право слободно и непречено да ги градат и искажуваат своите ставови и мислења, и имаат право на слободно собирање и изразување мирен јавен протест. Дури и Конвенцијата за правата на децата им ја гарантира на младите, слободата на мислење, на здружување и на мирно протестирање.
Едновремено, државата не само што треба да ги почитува основните слободи и права на граѓаните, таа има обврска да им овозможи на децата непречено уживање на нивните права вклучително и на правото на слободно изразување и здружување.
Имајќи го предвид ова, НВО Инфоцентарот бара веднаш да престанат сите форми на притисок и закани врз средношколците, родителите и наставниците, како и да бидат преземени сите мерки од страна на надлежните институции, граѓаните слободно и непречено да го изразат своето мислење и мирно да протестираат“, се вели во соопштението на организацијата.