„Кој е крив што градот ни е сив“ – марш против загадувањето во Скопје на 1 февруари

Еколошката организација Go Green најави протестен марш против загадувањето на воздухот во Скопје, кој ќе се одржи на 1 февруари (недела), под мотото „Кој е крив што градот ни е сив“.

Од  Go Green ги повикуваат сите граѓани кои ќе дојдат на протестниот марш да носат облека во темни бои, како и маски, со што симболично ќе се изрази револтот од постојаното енормно загадување во главниот град. Маршот ќе започне од Паркот на новинарите кај поранешна Нова Македонија, а ќе заврши пред Министерството за животна средина.

„Скопје може да се “пофали” за освоеното прво место, прво место за најзагаден Европски град. Секојдневно сме сведоци на се позагадениот воздух. Од ден на ден, нивото на ПМ10 честичките расте се повеќе и повеќе, обојувајќи го градот во сиво. Секои 10µg/m3 ПМ10 честици го зголемуваат ризикот за рак на бели дробови за дури 22% , а во Скопје нивото на овие честици достигна дури и до 700µg/m3 . Дозволеното ниво на овие честички изнесува максимум 50µg/m3 . Секоја година се соочуваме со истиот проблем. Бараме конкретни мерки за спречување на загадувањето. Не отворањето прозорец и седењето дома не се решение за загадениот воздух. Кој е крив што дишеме смог? Кој е крив за полните болници?

Дојде време да мораме да маршираме за да го имаме она што бесплатно сите не` следува. Нека овој марш биде што помасовен за да го привлече вниманието на надлежните органи, а до тогаш ние ќе маршираме прашувајќи Кој е крив што градот ни е сив?“, се вели во најавата на настанот.