Ирански филмови во Кинотека од 22 до 27 јануари

Шест филма од современата иранска кинематографија, снимени од 2005 до 2014 година, ќе бидат прикажани во Кинотеката на Македонија од 22 до 27 јануари.

Филмската ревија в понеделник ќе почне со „Слаткиот вкус на имагинацијата“ во режија на Камал Табризи, а во наредните денови со почеток во 20 часот ќе бидат прикажани и: „Еднаш, љубов и предавство“ во режија на Давуд Бидел; „Базен за сликање“ на Мазиар Мири; „Сосема сам“ во режија на Ехсан Абдипур; „Коцка шеќер“ на Реза Миикарими, кој е режисер и на последниот филм од програмата – „Толку блиску, а толку далеку“ на 27 јануари.

Кинотеката соопшти дека програмата се реализира со помош на Амбасадата на Исламска Република Иран во Скопје во чија селекција се и филмовите. Влезот за проекциите е бесплатен.

„Иранската е една од најистакнатите светски кинематографии. Иранските филмови се препознатливи по својот реализам, непретенциозност и едноставност во изразот. Но, преку тие навидум мали приказни се рефлeктира не само иранското општество, туку и некои универзални човекови дилеми. Такви се и филмовите од оваа селекција. Тоа се филмски наслови од поновата иранска продукција, од признати ирански режисери, директори на фотографија и познати актерски имиња кои имаат значајно место во светската кинематографија и имаат освоено голем број фестивалски награди“, соопшти Кинотеката на Македонија.