Google најави преку својот официјален блог дека ќе ја повлече апликацијата за гледање и обработка на слики Picasa, за помалку од три месеци. Компанијата бара од корисниците да се обидат со Google Photos во иднина.
Picasa Web Albums и Picasa Web Albums Data API ќе продолжат да работат нормално до 1 мај, 2016 година. После тоа, корисниците ќе можат само да ги гледаат нивните фотографии, додека програмерите ќе изгубат дел од функциите на API.
Компанијата најави дека ќе престане да ја поддржува десктоп верзијата на Picasa порано, од 15 март. Но, ако корисниците го имаат вградено софтверот, ќе можат да ја користат и понатаму, иако повеќе нема да се ажурира.
Google вели дека „ја пензионира“ Picasa со цел да се фокусира целосно на само една апликација што ќе обезбеди поголема функционалност, ќе работи на мобилен и десктоп верзија, наместо да го дели својот труд на два различни производи.
Од мај, сите фотографии и видеа кои се во Picasa Web Albums ќе бидат преместени во Google Photos. За корисниците на Picasa, кои не сакаат да користат Google Photos, компанијата најави дека работи на создавање на ново место каде луѓето ќе можат да пристапат до нивните албуми со фотографии поставени на оваа апликација.
Google ја презеде Picasa од Lifescape во јули 2004 година и оттогаш ја нуди бесплатно. Името Picasa всушност, е мешавина од „pic“ од „слика“ и „casa“ од фразата „mi casa“ („мојата куќа“).