ЕЦПР: Институциите не реагираат на силувањата на штитенички од домот „25 Мај“

Тринаесетгодишно девојче, штитеничка на државната институција за згрижување деца „25 Мај“ во Скопје, вчера абортирала откако забременила од сексуално злоставување, алармира Европскиот центар за
правата на Ромите (ЕЦПР). Од здружението ги повикуваат надлежните власти веднаш да реагираат и на ова девојче да му обезбедат соодветна медицинска грижа за да се осигури нејзиното психолошко и физичко здравје, но и да се врати на нејзиното ромско семејство од кое била принудно одземена во
2012 година поради сиромаштија.

„Р.И. е трауматизирана по постапката на којашто на родителите не им било дозволено да присуствуваат, спротивно на нејзината искажана желба. Надлежните институции не преземале никакви мерки да ѝ помогнат на Р.И. и на нејзиното семејство за да излезат од сиромаштија, ниту пак го признале сопствениот неуспех да ја заштитат малолетничката од сексуално злоставување додека престојувала во државна институција“, соопштија од ЕЦПР.

На 1 март 2017 година, ЕЦПР добиле информација од нејзините родители дека девојчето исчезнало од домот „25 Мај“.

„Одговорните лица не го пријавиле нејзиното исчезнување ниту во полиција, ниту на нејзините родители. Според нејзиното сведочење, пред откриеното сексуално злоставување на ромски девојки под државна заштита во Македонија, девојката била принудно земена од страна на постар маж од институцијата, кој со возило ја одвел во неговиот дом во друг град. Таму, таа била принудена на сексуални односи и физичка работа. Успеала да избега по 30 дена и да се качи на автобус за Скопје каде полицијата ја нашла на Бит-пазар. Освен тоа, таа опиша дека претходно била однесена во „детски летен камп“ во Струга, заедно со други деца од државниот дом за згрижување. Таму, непознат маж сексуално ја злоставувал, пред да биде вратена назад во Скопје. Кога ги пријавила овие злоставувања кај згрижувачите од државната институција, била обвинета дека лаже и дека ги измислува настаните. Потоа, Р.И. била пренесена во друга државна институција за згрижување „Ранка Милановиќ“ во Скопје, каде открила дека останала бремена како резултат на сексуалното насилство“, наведуваат од организацијата.

Тие посочуваат дека слични сведочења добиле и од две ромски сестри, штитенички на домот за
згрижување деца „25 Мај“, В.А. на возраст од 16 години и Л.А. на возраст од 13 години.

„И тие често исчезнувале од домот за згрижување деца, и на сличен начин, нивните исчезнувања не биле
пријавени во полиција или на родителите. Според нивните искази, постар маж кој се идентификувал
како вработен во Центарот за социјална работа ги земал од домот за згрижување и ги однел на
старата железничка станица во Скопје, каде врз нив извршил сексуално злоставување. Нивната мајка
го пријавила случајот во полиција и ги однела на гинеколог, кој заклучил дека девојките навистина
биле жртви на сексуално насилство“, посочуваат од ЕЦПР.

Во трите случаи, ЕЦПР ги поддржува родителите на овие девојки во покренување судска постапка против државниот дом за згрижување деца „25 Мај“, Меѓуопштинскиот центар за социјална работа и Министерството за труд и социјална политика. Исто така, додаваат, се прават напори сестрите да бидат вратени на нивната мајка.

„Во најдобар случај, одговорните лица од овој дом за згрижување деца биле небрежни во однос на
сексуалното злоставување што се случувало таму, а во најлош случај, тие се соучесници во
делото“, рече претседателот на ЕРРЦ, Ѓорѓе Јовановиќ. „Овие девојки и нивните семејства се
исклучително храбри во нивните напори да ги изведат пред суд одговорните кои дозволиле ова
да се случува.“

Според барањето за слободен пристап до информации што го испратиле ЕЦПР, две третини (22 од
вкупно 32) деца кои се штитеници на домот за згрижување деца „25 Мај“ се од ромско етничко
потекло.

„Доказите за систематско сексуално злоставување на ромските деца во оваа институција
упатуваат на фактот дека сите овие деца се во опасност сè додека властите продолжуваат да го
игнорираат она што се случува. Македонската влада продолжува да ги виктимизира ромските
семејства кои живеат во сиромаштија со тоа што не успева да поведе истрага за нивната
добросостојба и со тоа што останува слепа на злоставувањата. Во меѓувреме, во Скопје денес има
една уплашена 13-годишна девојка на која ѝ потребна итна медицинска, финансиска и семејна
поддршка поради неуспехот на државните институции за згрижување да ја заштитат“, алармираат од организацијата.